ក្រសួងអប់រំ និងក្រុមហ៊ុនជប៉ុន Surala Net ចុះកិច្ចព្រមព្រៀងពង្រឹងការសិក្សាគណិតវិទ្យាតាមបែបឌីជីថល ៥ឆ្នាំ

ក្រសួងអប់រំ និងក្រុមហ៊ុនជប៉ុន Surala Net ចុះកិច្ចព្រមព្រៀងពង្រឹងការសិក្សាគណិតវិទ្យាតាមបែបឌីជីថល ៥ឆ្នាំ

ក្រសួងអប់រំ យុវជន និងកីឡា និងក្រុមហ៊ុនជប៉ុន Surala Net បានចុះកិច្ចព្រមព្រៀងលើកិច្ចសហប្រតិបត្តិការបង្រៀនគណិតវិទ្យាតាមបែបឌីជីថលជាភាសាខ្មែរ រយៈពេល ៥ ឆ្នាំ ដើម្បីពង្រឹងសមត្ថភាពសិស្សានុសិស្ស និងគ្រូបង្រៀនកម្ពុជាក្នុងមុខវិជ្ជានេះ។

ពិធីចុះកិច្ចព្រមព្រៀងបានធ្វើឡើងនៅថ្ងៃទី ២១ ខែសីហា ឆ្នាំ ២០២៥ ដោយមានការចូលរួមចុះហត្ថលេខាពី លោកបណ្ឌិតសភាចារ្យ ហង់ជួន ណារ៉ុន អនុញ្ញាតឧបនាយករដ្ឋមន្ត្រី និងរដ្ឋមន្ត្រីក្រសួងអប់រំ យុវជន និងកីឡា និងតំណាងក្រុមហ៊ុន Surala Net Co., Ltd ដឹកនាំដោយ លោក Mr. Takayuki Yunokawa អគ្គនាយកក្រុមហ៊ុន។

កិច្ចសហប្រតិបត្តិការនេះផ្តោតលើគម្រោងពង្រឹងសមត្ថភាពសិស្សានុសិស្សថ្នាក់បឋមសិក្សា និងមធ្យមសិក្សានៅកម្ពុជា ក៏ដូចជាការអភិវឌ្ឍសម្ភារៈបង្រៀនគណិតវិទ្យាតាមបែបឌីជីថលជាភាសាខ្មែរ។ គោលបំណងសំខាន់របស់គម្រោងនេះ រួមមាន:
– កែលម្អសមត្ថភាពគណិតវិទ្យារបស់សិស្សានុសិស្ស និងការកសាងសមត្ថភាពគ្រូបង្រៀន។
– លើកកម្ពស់ប្រើប្រាស់បច្ចេកវិទ្យាព័ត៌មាន និងទំនាក់ទំនង (ICT) ក្នុងការបង្រៀន។
– បង្កើត និងអភិវឌ្ឍកម្មវិធីសិក្សាដែលមានប្រសិទ្ធភាព និងឆ្លើយតបនឹងតម្រូវការអប់រំសាធារណៈ។
– ជំរុញសមត្ថភាពប្រកួតប្រជែងរបស់កុមារកម្ពុជានៅឆាកអន្តរជាតិ។

លោកអគ្គនាយកក្រុមហ៊ុន Surala Net បានលើកឡើងថា កម្មវិធី E-Learning នេះ បានបញ្ចូលភាសាខ្មែរបន្ថែមពីលើភាសាអង់គ្លេស ឥណ្ឌូនេស៊ី និងស្រីលង្កា ដើម្បីពង្រីកការចូលប្រើប្រាស់ និងជួយសម្រួលការសិក្សា។

ចំពោះកិច្ចសហប្រតិបត្តិការនេះ លោកបណ្ឌិតសភាចារ្យ ហង់ជួន ណារ៉ុន បានកោតសរសើរ និងថ្លែងអំណរគុណដល់ក្រុមហ៊ុន Surala Net និងរាជរដ្ឋាភិបាលជប៉ុន ដែលគាំទ្រនិងចូលរួមក្នុងការអភិវឌ្ឍវិស័យអប់រំកម្ពុជា។ លោកជឿជាក់ថា កម្មវិធីរៀនគណិតវិទ្យាបែបជប៉ុននេះ នឹងរួមចំណែកពង្រឹងសមត្ថភាពរៀនគណិតវិទ្យារបស់សិស្សានុសិស្សកម្ពុជា និងជំរុញសមត្ថភាពប្រកួតប្រជែងរបស់យុវជនកម្ពុជាឱ្យកាន់តែខ្លាំងនៅអនាគត៕