អគ្គនាយក CMAM បង្ហាញអំពីសុច្ឆន្ទៈ រាជរដ្ឋាភិបាល ក្នុងកិច្ចសហប្រតិបត្តិបោសសម្អាតមីន តាមបណ្តោយព្រំដែនកម្ពុជា-ថៃ
អគ្គនាយក CMAM បង្ហាញអំពីសុច្ឆន្ទៈ រាជរដ្ឋាភិបាល ក្នុងកិច្ចសហប្រតិបត្តិបោសសម្អាតមីន តាមបណ្តោយព្រំដែនកម្ពុជា-ថៃ
ភ្នំពេញ៖ នៅរសៀលថ្ងៃទី២១ ខែសីហា ឆ្នាំ២០២៥ នៅទីស្តីការក្រសួងការបរទេសនិងសហប្រតិបត្តិការអន្តរជាតិ លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជា ខណៈអញ្ជើញ ចូលរួមក្នុងកិច្ចប្រជុំដើម្បីជម្រាបជូនពីការវិវត្តថ្មីៗនៃបញ្ហាជម្លោះព្រំដែនកម្ពុជា-ថៃ ដល់សមាជិកអង្គទូតបរទេសចំនួន៤២ប្រទេសនិងទីភ្នាក់ងារអង្គការសហប្រជាជាតិចំនួន២២ ប្រចាំនៅព្រះរាជាណាចក្រកម្ពុជា ដឹកនាំដោយឯកឧត្តមឧបនាយករដ្ឋមន្រ្តីប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បាន បង្ហាញអំពីសុច្ឆន្ទៈ រាជរដ្ឋាភិបាល ក្នុងកិច្ចសហប្រតិបត្តិបោសសម្អាតមីន តាមបណ្តោយព្រំដែនកម្ពុជា-ថៃ។
បើតាមលោក ហេង រតនា កម្ពុជាបានប្តេជ្ញាចិត្តដ៏ម៉ឺងម៉ាត់ក្នុងការគោរពបទឈប់បាញ់រវាងកម្ពុជា-ថៃ ដែលបានព្រមព្រៀងកាលពីថ្ងៃទី២៨ ខែកក្កដា ឆ្នាំ២០២៥ នៅទីក្រុងពូត្រាចាយ៉ា។ ក្នុងកិច្ចប្រជុំនេះដែរ ឯកឧត្តមឧបនាយករដ្ឋមន្ត្រី ក៏បានជម្រាបជូនអង្គប្រជុំអំពីស្ថានភាពមីននៅប្រទេសកម្ពុជា ជាពិសេសនៅតាមបណ្តោយព្រំដែនកម្ពុជា-ថៃ ព្រមទាំងបានអះអាងសារជាថ្មីថា កម្ពុជាបានគោរពយ៉ាងម៉ឺងម៉ាត់នូវអនុសញ្ញាស្តីពីការហាមប្រាមការប្រើប្រាស់មីនប្រឆាំងនឹងមនុស្ស (អនុសញ្ញាអូតាវ៉ា)។
ក្នុងកិច្ចប្រជុំនេះដែរ ឯកឧត្តមឧបនាយករដ្ឋមន្ត្រីក៏បានបញ្ជាក់ច្បាស់ពីជំហររាជរដ្ឋាភិបាលកម្ពុជា ក្នុងការបន្តខិតខំប្រឹងប្រែងបោសសម្អាតមីនមនុស្សធម៌ក្នុងការបម្រេីគោលដៅសុវត្ថិភាពមនុស្សជាតិ ការអភិវឌ្ឍសេដ្ឋកិច្ចសង្គម និងហេដ្ឋារចនាសម្ពន្ធ័រូបវន្ត។
ទន្ទឹមនឹងនេះ រាជរដ្ឋាភិបាល មានគោលបំណងប្រកបដោយសុច្ចន្ទៈក្នុងការបោសសម្អាតមីនតាមបណ្តោយព្រំដែន ដោយបានលេីកសំណេីទៅកាន់ភាគីថៃក្នុងកិច្ចសហប្រតិបត្តិការ ការបោសសម្អាតមីននៅតំបន់តាមបណ្តោយព្រំដែនកម្ពុជា-ថៃ ដោយផ្តល់អាទិភាពចំបងនៅតំបន់ណាមានប្រជាជនកំពុងរស់នៅនិងតម្រូវការខាងការអភិវឌ្ឍសេដ្ឋកិច្ចសង្គមជាមួយនឹងការកំណត់ខ្សែបន្ទាត់ព្រំដែនរួចហេីយ!!។
