ឧកញ៉ា ឡាយ ឈុនហួរ ត្រូវបានជ្រើសតាំងជា ប្រធានសហព័ន្ធស្រូវអង្ករកម្ពុជា អាណត្តិទី៥ លើសំឡេងគាំទ្រ១១៦ លើ១១៧សំឡេង
ឧកញ៉ា ឡាយ ឈុនហួរ ត្រូវបានជ្រើសតាំងជា ប្រធានសហព័ន្ធស្រូវអង្ករកម្ពុជា អាណត្តិទី៥ លើសំឡេងគាំទ្រ១១៦ លើ១១៧សំឡេង
ភ្នំពេញ៖ ឧកញ៉ា ឡាយ ឈុនហួរ ត្រូវបានជ្រើសតាំងជា ប្រធានសហព័ន្ធស្រូវអង្ករកម្ពុជា អាណត្តិទី៥ ក្នុងសំឡេងគាំទ្រ ១១៦សំឡេង លើ១១៧សំឡេង ខណៈ ឧកញ៉ា ចាន់ សុឃាំង ត្រូវបានជ្រើសតាំងជាប្រធានក្រុមប្រឹក្សាសហព័ន្ធស្រូវអង្ករកម្ពុជា អាណត្តិទី៥ ពីសមាជិកក្រុមប្រឹក្សាភិបាល ចំនួន ២៨ លើ ២៨ សំឡេង។
បើតាមសេចក្តីប្រកាសព័ត៌មានរបស់ សហព័ន្ធស្រូវអង្ករកម្ពុជា នារសៀលថ្ងៃទី២៦ ខែសីហា ឆ្នាំ២០២៥នេះ បានឲ្យដឹងថា សហព័ន្ធស្រូវអង្ករកម្ពុជា បានរៀបចំនូវកម្មវិធីមហាសន្និបាតសហព័ន្ធស្រូវអង្ករកម្ពុជា អាណត្តិទី៤ និងការបោះឆ្នោតជ្រើសរើសប្រធានសហព័ន្ធ ប្រធាន និងសមាជិកក្រុមប្រឹក្សាភិបាល នៃសហព័ន្ធស្រូវអង្ករកម្ពុជា អាណត្តិទី៥ ដែលពិធីបើកប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និង ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ។
សម្រាប់អ្នកឈរឈ្មោះក្រុមប្រឹក្សាភិបាលក្នុងអាណត្តិទី៥ មានចំនួន ៣១ នាក់ ដែលក្នុងនោះមានប្រធានសហព័ន្ធ ចំនួន ១នាក់ សមាជិកក្រុមប្រឹក្សាភិបាលចំនួន២៧នាក់ និងតំណាងសហគមន៍កសិកម្មជាប់ដោយស្វ័យប្រវត្តិចំនួន ៣ នាក់។
នៅក្នុងកម្មវិធីនេះដែរ មានអ្នកចូលរួមសរុបប្រមាណចំនួន ៣០០ នាក់ ក្នុងនោះអ្នកមានសិទ្ធិចូលរួមបោះឆ្នោតចំនួន ១១៧ នាក់ ដែលជាសមាជិកសកម្មរបស់សហព័ន្ធស្រូវអង្ករកម្ពុជា។ ជាលទ្ធផល ឧកញ៉ា ឡាយ ឈុនហួរ ត្រូវបានទទួលសំឡេងគាំទ្រជាប់ជាប្រធានសហព័ន្ធស្រូវអង្ករកម្ពុជា អាណត្តិទី៥ ចំនួន ១១៦ លើ ១១៧ សំឡេង និង ឧកញ៉ា ចាន់ សុឃាំង ត្រូវបានទទួលសំឡេងគាំទ្រជាប់ជាប្រធានក្រុមប្រឹក្សាសហព័ន្ធស្រូវអង្ករកម្ពុជា អាណត្តិទី៥ ពីសមាជិកក្រុមប្រឹក្សាភិបាល ចំនួន ២៨ លើ ២៨ សំឡេង៕
