
ចៅប្រុសជនជាតិវៀតណាមវ័យ២៦ឆ្នាំម្នាក់ ត្រូវបានចាប់ខ្លួន ក្រោយយកពូថៅគំរាមសម្លាប់ជីដូន ៧០ឆ្នាំ ព្រោះខឹងជីដូនដែលមិនជួយចូលស្តីដណ្ដឹងប្រពន្ធឲ្យ

ខេត្តកណ្ដាល៖ នគរបាលស្រុកពញាឮ បានចាប់ខ្លួនជនសង្ស័យជាជនជាតិវៀតណាមម្នាក់ បន្ទាប់ពីយកពូថៅគំរាមសម្លាប់ជីដូនរបស់ខ្លួន ដោយសារខឹងព្រោះជីដូនមិនជួយចូលស្តីដណ្ដឹងប្រពន្ធឲ្យ។ ករណីនេះបានកើតឡើងនៅថ្ងៃទី ១៧ ខែសីហា ឆ្នាំ ២០២៥ នៅភូមិសង្វរ ឃុំកំពង់លួង ស្រុកពញាឮ ខេត្តកណ្ដាល។
មន្ត្រីនគរបាលបានឲ្យដឹងថា ជនរងគ្រោះឈ្មោះ ង្វៀង ធីវៀង ភេទស្រី អាយុ ៧០ ឆ្នាំ ជនជាតិវៀតណាម មានទីលំនៅក្នុងភូមិសង្វរ។ ចំណែកជនសង្ស័យឈ្មោះ ង្វៀង យុំាងវឺន ភេទប្រុស អាយុ ២៦ ឆ្នាំ ជាជនជាតិវៀតណាម មានទីលំនៅដូចគ្នា។ វត្ថុតាងដែលត្រូវបានចាប់យក គឺពូថៅប្រវែងប្រមាណ ៤៤សង់ទីម៉ែត្រ។
បើយោងតាមប្រភពដដែល បានអោយដឹងថា កាលពីថ្ងៃកើតហេតុ ជនរងគ្រោះកំពុងស្នាក់នៅផ្ទះ ស្រាប់តែជនសង្ស័យកាន់ពូថៅស្រែកឡូឡា និងគំរាមសម្លាប់ជីដូន។ សាច់ញាតិដែលឃើញហេតុការណ៍ ក៏បានជូនដំណឹងឲ្យកូនប្រុសរបស់ជនរងគ្រោះមកដល់ទីតាំង តែទោះបីជាមកដល់ ក៏ជនសង្ស័យនៅតែបន្តប្រព្រឹត្តអំពើគំរាមបែបដដែល។
គួរបញ្ជាក់ផងដែរថា ជនសង្ស័យតែងតែរករឿង និងកាន់កាំបិតគំរាមសម្លាប់ជនរងគ្រោះជាញឹកញាប់ ដល់ថ្នាក់កូនប្រុសរបស់ជនរងគ្រោះ ត្រូវយកកាំបិតនោះទៅបោះចោល។ ក្រោយហេតុការណ៍ ឈ្មោះ ង្វៀង យុំាងង្វៀង ដែលជាកូនប្រុសរបស់ជនរងគ្រោះ បានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលកំពង់លួង។ បន្ទាប់មក កម្លាំងនគរបាលបានចុះស្រាវជ្រាវ និងនាំខ្លួនជនសង្ស័យមកអធិការដ្ឋាននគរបាលស្រុកពញាឮ។
ជនសង្ស័យបានឆ្លើយសារភាពថា មូលហេតុដែលចេះតែរករឿង និងគំរាមសម្លាប់ជីដូន ព្រោះខឹងចំពោះជីដូនដែលមិនចូលជួយស្តីដណ្ដឹងប្រពន្ធឲ្យ និងសព្វថ្ងៃក៏ប្រើប្រាស់គ្រឿងញៀនផងដែរ។
បច្ចុប្បន្ន សមត្ថកិច្ចកំពុងឃាត់ខ្លួនជនសង្ស័យ ដើម្បីកសាងសំណុំរឿងចាត់ការតាមនីតិវិធី៕
