អភិបាលខេត្តបាត់ដំបូង ស្នេីភាគីកូរ៉េជួយកៀរគរអ្នកវិនិយោគមកបណ្ដាក់ទុន លេីការកែច្នៃផលិតផលកសិកម្ម
អភិបាលខេត្តបាត់ដំបូង ស្នេីភាគីកូរ៉េជួយកៀរគរអ្នកវិនិយោគមកបណ្ដាក់ទុន លេីការកែច្នៃផលិតផលកសិកម្ម
ខេត្តបាត់ដំបង៖ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង ក្នុងជំនួប សម្តែងការគួរសម និងពិភាក្សាការងារជាមួយ ឯកឧត្តម KIM SUNGTAI អគ្គកុងស៊ុល នៃស្ថានកុងស៊ុលសាធារណរដ្ឋកូរ៉េ ប្រចាំខេត្តសៀមរាប ដើម្បីពង្រឹងទំនាក់ទំនង និងស្វែងយល់ពីសក្តានុពលនៅខេត្តបាត់ដំបង នារសៀលថ្ងៃទី២៦ ខែសីហា ឆ្នាំ២០២៥នេះ ភាគីកម្ពុជា បានស្នើឲ្យកូរ៉េ ជួយកៀរគរអ្នកវិនិយោគមកបណ្តាក់ទុន រកស៉ីលើការកែច្នៃផលិតផលកសិកម្ម។
ឯកឧត្តមអភិបាលខេត្ត បានថ្លែងទៅកាន់ ឯកឧត្តម អគ្គកុងស៊ុលថា បាត់ដំបងជាខេត្តស្ថិតនៅភាគពាយ័ព្យ នៃប្រទេសកម្ពុជា មានព្រំប្រទល់ជាប់នឹងប្រទេសថៃប្រវែងជាង១៤៤,៨ គីឡូម៉ែត្រ មានច្រកអន្តរជាតិ២ និងច្រកតំបន់៣ ជាមួយប្រទេសថៃ។ ខេត្តបាត់ដំបង ជាខេត្តដែលមានសក្ដានុពលលេីវិស័យកសិកម្ម និងទេសចរណ៍ និងសេវាកម្ម មានប្រជាជនជាង ១លាន ៣សែននាក់ មាន១៤ ក្រុង ស្រុក ភាគច្រើនបងប្អូនប្រជាពលរដ្ឋប្រកបរបរកសិកម្ម។
បើតាមលោក សុខ លូ ខេត្តបាត់ដំបងគឺជាខេត្តដែល កំពុងអភិវឌ្ឍន៍ មិនត្រឹមតែមានសក្ដានុពលខាងផ្នែកកសិកម្មប៉ុណ្ណោះទេ ថែមទាំងមានសក្តានុពលខាងផ្នែកទេសចរណ៍ផងដែរ ដោយក្នុងក្រុងបាត់ដំបងមានសំណង់បុរាណជាង ៨០០ ខ្នងផ្ទះ និងមានវត្តបុរាណជាច្រើនដែលមានវ័យចំណាស់ជាង ១០០ឆ្នាំត្រូវបានថែរក្សា និងអភិរក្ស។
ឯកឧត្តម អភិបាល ខេត្ត ស្នេីភាគីកូរ៉េជួយកៀរគរអ្នកវិនិយោគកូរ៉េ មកបណ្ដាក់ទុន រកស៊ីនៅកម្ពុជា លេីការកែច្នៃផលិតផលកសិកម្មដ៏សំបូរបែប។
ពាក់ព័ន្ធ បញ្ហាព្រំដែន កម្ពុជា-ថៃ ឯកឧត្តម សុខ លូ ថ្លែងថា ប្រទេសកម្ពុជាចង់បានសន្តិភាព បូរណភាពទឹកដី និងព្រំប្រទល់មានការទទួលស្គាល់ដោយអន្តរជាតិ ហេីយកម្ពុជាមិនចង់មានសង្គ្រាមជាមួយប្រទេសជិតខាងណាមួយទេ គឺចង់បានសន្តិភាព ដូច្នេះសូមឱ្យ ឯកឧត្តមអគ្គកុងស៊ុលជួយអំពាវនាវ ឱ្យអន្តរជាតិទទួលស្គាល់នូវការខិតខំតប្រឹងប្រែងរបស់កម្ពុជាដើម្បីទទួលបានសន្តិភាព។
ជាការឆ្លេីយតប ឯកឧត្តម អគ្គ កុងស៊ុល បានទទួលយកនូវអ្វីដែល ឯកឧត្តម អភិបាលខេត្តបានលេីកឡេីង។ ក្នុងជំនួបសម្តែងការគួរសម និងពិភាក្សាកាងានេះដែរ ឯកឧត្តម KIM SUNGTAI អគ្គកុងស៊ុល នៃស្ថានកុងស៊ុលសាធារណរដ្ឋកូរ៉េ ប្រចាំខេត្តសៀមរាប ក៏បានថ្លែងអំណរគុណ ដល់រដ្ឋបាលខេត្តបាត់ដំបង ដែលបានទទួលស្វាគមន៍យ៉ាងរាក់ទាក់ និងផ្តល់ការគាំទ្រដល់កិច្ចសហប្រតិបត្តិការ និងបានផ្តល់ឱកាសបានសិក្សាស្វែងយល់ពីសក្តានុពល និងស្វែងយល់អំពីឱកាសវិនិយោគ ក្នុងខេត្តបាត់ដំបង ដែលជាខេត្តដ៏ល្អមួយនេះ ជាពិសេសយើងមានឆន្ទៈដូចគ្នា ក្នុងការជួយអភិវឌ្ឍន៍ប្រទេសជាតិ។
ឯកឧត្តម អគ្គកុងស៊ុល គូសបញ្ជាក់ ថាការជួបសម្តែងការគួរសមនាពេលនេះដែរ គឺមានគោលបំណង ដើម្បីស្វែងរកការគាំទ្រ និងជួយលើកកម្ពស់កិច្ចសហប្រតិបត្តិការលើកកម្ពស់ការធ្វើពាណិជ្ជកម្ម និងការលើកកម្ពស់វិស័យទេសចរណ៍ និងការទំនាក់ទំនងរវាងប្រជាជននិងប្រជាជន ការវិនិយោគរវាងប្រទេសទាំងពីរ ជាពិសេសខេត្តបាត់ដំបង និងសាធារណៈកូរ៉េដើម្បីលើកតម្កើងនូវស្ថានភាពសេដ្ឋកិច្ចរបស់ប្រជាជននៃប្រទេសទាំងពីរឱ្យមានភាពល្អប្រសើរឡើងថែមទៀត៕
