សម្តេចធិបតី ហ៊ុន ម៉ាណែត សន្ទនាតាមទូរស័ព្ទជាមួយ លោក Anthony Albenese នាយករដ្ឋមន្រ្តីអូស្រ្តាលី អបអរសាទរចំពោះលទ្ធផលជោគជ័យ នៃបោះឆ្នោត
សម្តេចធិបតី ហ៊ុន ម៉ាណែត សន្ទនាតាមទូរស័ព្ទជាមួយ លោក Anthony Albenese នាយករដ្ឋមន្រ្តីអូស្រ្តាលី អបអរសាទរចំពោះលទ្ធផលជោគជ័យ នៃបោះឆ្នោត
ភ្នំពេញ៖សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានសន្ទនាតាមទូរស័ព្ទជាមួយលោក Anthony Albenese នាយករដ្ឋមន្រ្តីអូស្រ្តាលី ដើម្បីសម្តែងការអបអរសាទរចំពោះលទ្ធផលជោគជ័យនៃការបោះឆ្នោតសហព័ន្ធ។
តាមរយៈបណ្តាញសង្គម នាថ្ងៃទី៦ ខែឧសភា ឆ្នាំ២០២៥នេះ សម្តេចធិបតី បង្ហាញខ្លឹមសារថា “នារសៀលនេះ ខ្ញុំបានសន្ទនាជាមួយឯកឧត្តម Anthony Albenese នាយករដ្ឋមន្ត្រីអូស្ត្រាលីតាមទូរសព្ទ ដើម្បីសម្ដែងការអបអរសាទរជាមួយនឹងជោគជ័យដ៏ត្រចះត្រចង់របស់គណបក្សពលករអូស្ត្រាលី (Australian Labor Party) របស់ឯកឧត្តម ក្នុងការបោះឆ្នោតសហព័ន្ធ កាលពីថ្ងៃសៅរ៍ទី ៣ ខែឧសភា ឆ្នាំ២០២៥ កន្លងទៅនេះ។
សម្តេចធិបតី ហ៊ុន ម៉ាណែត បានបន្តទៀតថា លទ្ធផលនៃការបោះឆ្នោតនេះបានបញ្ជាក់យ៉ាងច្បាស់ថា ប្រជាពលរដ្ឋអូស្ត្រាលី មានជំនឿជឿជាក់យ៉ាងមុតមាំលើការដឹកនាំរបស់ឯកឧត្តម Anthony Albeneses និងបន្តគាំទ្រឯកឧត្តមធ្វើជានាយករដ្ឋមន្ត្រី ដើម្បីដឹកនាំរដ្ឋាភិបាល កសាងសមិទ្ធផលបន្ថែមទៀតជូនប្រជាពលរដ្ឋអូស្ត្រាលី”។
សម្តេចបានសង្កត់បន្ថែមទៀតថា “ខ្ញុំមានជំនឿជឿជាក់យ៉ាងមុតមាំថា ក្រោមការដឹកនាំរបស់ឯកឧត្តម ប្រទេសយើងទាំងពីរនិងបន្តលើកកម្ពស់កិច្ចសហប្រតិបត្តិការលើគ្រប់វិស័យកាន់តែល្អប្រសើរបន្ថែមទៀត ដើម្បីជាផលប្រយោជន៍រួមរបស់ប្រទេសនិងប្រជាជនកម្ពុជានិងអូស្ត្រាលី”។
គួរបញ្ជាក់ថា គណបក្សពលករ (Labor Party) បាននាំមុខក្នុងការបោះឆ្នោតសកល នាថ្ងៃសៅរ៍ ទី៣ ខែឧសភា ឆ្នាំ ២០២៥ ដោយលោក Anthony Albanese នឹងបន្តកាន់តំណែងជានាយករដ្ឋមន្រ្តីនៅអាណត្តិថ្មី។ ភ្លាមៗក្រោយប្រកាសលទ្ធផលមេដឹកនាំគណបក្សអភិរក្សនិយម ដែលជាបក្សប្រឆាំងរបស់ប្រទេសអូស្ត្រាលី លោក Peter Dutton បាននិយាយថា លោកបានបាត់បង់អាសនៈនៅក្នុងសភា ហើយយទទួលស្គាល់ថាចាញ់នៅក្នុងការបោះឆ្នោតសកលនាថ្ងៃសៅរ៍នេះ។ លទ្ធផលនេះគឺជាប្រវត្តិសាស្ត្រសម្រាប់គណបក្សពលករ របស់ លោក Anthony Albanese ដែលជាបក្សកាន់អំណាច។ តាមគេហទំព័រគណៈកម្មការរៀបចំការបោះឆ្នោតអូស្ត្រាលី គណបក្សពលករអាចនឹងទទួលបាន ៨១អាសនៈ ក្នុងចំណោមអាសនៈចំនួន ១៥០នៅក្នុងសភា។ ពលរដ្ឋស្ត្រាលី ៨លាននាក់ ក្នុងចំណោមអ្នកមានសិទ្ធិបោះឆ្នោត ១៨លាននាក់បានបោះឆ្នោតរួចទៅហើយ នៅមុនការបោះឆ្នោតថ្ងៃសៅរ៍នេះ។ នៅអូស្ត្រាលី ការបោះឆ្នោតគឺជាកាតព្វកិច្ចខានមិនបានមួយកំណត់ដោយច្បាប់សម្រាប់ពលរដ្ឋដែលមានសិទ្ធិបោះឆ្នោត ហើយអ្នកដែលមិនបានបំពេញករណីកិច្ចមួយនេះនឹងត្រូវពិន័យជាប្រាក់ ២០ដុល្លារអូស្ត្រាលី ឬស្មើនឹង១៣ដុល្លារអាមេរិក ដែលនេះបានជំរុញឱ្យអត្រាអ្នកចូលរួមក្នុងការបោះឆ្នោតអាចមានដល់ ៩០ភាគរយ៕
