អគ្គមេបញ្ជាការ អនុញ្ញាតឲ្យទីប្រឹក្សាយោធាប្រទេសនីហ្សេរីយ៉ា ចូលជួបសម្តែងការគួរសម និងពិភាក្សាការងារ

អគ្គមេបញ្ជាការ អនុញ្ញាតឲ្យទីប្រឹក្សាយោធាប្រទេសនីហ្សេរីយ៉ា ចូលជួបសម្តែងការគួរសម និងពិភាក្សាការងារ

ភ្នំពេញ៖ នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានអនុញ្ញាតឱ្យឧត្តមសេនីយ៍ទោ RAZAQ KOLAWOLE SHITTU ទីប្រឹក្សាយោធានីហ្សេរីយ៉ាប្រចាំកម្ពុជា ដែលមាននិវេសនដ្ឋាននៅទីក្រុងកូឡាឡាំពួរ ប្រទេសម៉ាឡេស៊ី ចូលជួបសម្ដែងការគួរសម នាព្រឹកថ្ងៃទី៥ ខែមិថុនា ឆ្នាំ២០២៥ នៅអគ្គបញ្ជាការដ្ឋាន។
នៅក្នុងឱកាសនោះ នាយឧត្តមសេនីយ៍ វង្ស ពិសេន បានសម្តែងនូវការស្វាគមន៍ចំពោះដំណើរបំពេញទស្សនកិច្ចរបស់ឧត្តមសេនីយ៍ទោ RAZAQ ដោយជឿជាក់ថា តាមរយៈនៃដំណើរទស្សនកិច្ចនេះ នឹងជួយពង្រឹងដល់ទំនាក់ទំនង កិច្ចសហប្រតិបត្តិការរវាងកងទ័ពប្រទេសទាំងពីរ។
ឧត្តមសេនីយ៍ទោ RAZAQ KOLAWOLE SHITTU បានចាត់ទុកជំនួបនាពេលនេះថា គឺជាប្រពៃណីដែលកងទ័ពនីហ្សេរីយ៉ាតែងតែចូលជួបសម្ដែងការគួរសម ដើម្បីណែនាំនិងបង្ហាញខ្លួនជូន អគ្គមេបញ្ជាការបានស្គាល់ បន្តពង្រឹងពង្រីកទំនាក់ទំនងរវាងប្រទេសនីហ្សេរីយ៉ា និងកម្ពុជា។
ឧត្តមសេនីយ៍ទោ RAZAQ KOLAWOLE SHITTU ក៏បានគូសបញ្ជាក់ពីបច្ចុប្បន្នភាពនៃប្រទេសទាំងពីរ ដែលកំពុងបង្កើនទំនាក់ទំនងជាមួយគ្នា ហើយអ្វីដែលពិសេសនោះគឺ នីហ្សេរីយ៉ានិងកម្ពុជា កំពុងអភិវឌ្ឍន៍ដូចគ្នា ដោយសង្ឃឹមថាប្រទេសទាំងពីរនឹងផ្តល់ឱកាសដល់ការចែករំលែកបទពិសោធន៍ និងចំណេះដឹងឲ្យគ្នាបានច្រើន។
ឧត្តមសេនីយ៍ទោ RAZAQ បានចាប់អារម្មណ៍លើការងារបណ្ដុះបណ្ដាល ដែលប្រទេសនីហ្សេសេរីយ៉ានិងព្រះរាជាណាចក្រកម្ពុជា មានវិទ្យាស្ថានបណ្ដុះបណ្ដាលជាច្រើន។ ដោយហេតុនេះប្រទេសនីហ្សេរីយ៉ា បានស្វាគមន៍ដល់យោធិន នៃកងយោធពលខេមរភូមិន្ទ ដែលមានបំណងចង់ទៅបណ្ដុះបណ្ដាលនៅប្រទេសនីហ្សេរីយ៉ា បើប្រទេសទាំងពីរមានកិច្ចព្រមព្រៀងជាមួយគ្នា។
នាយឧត្តមសេនីយ៍ វង្ស ពិសេន បានថ្លែងអំណរគុណចំពោះការលើកឡើងនេះ ព្រោះនេះជាការចង់បានរបស់អគ្គបញ្ជាការ ក្នុងការបណ្ដុះបណ្ដាលធនធានមនុស្ស។ តែចំពោះមុខគប្បីត្រូវធ្វើការសម្របសម្រួលនៅថ្នាក់ក្រសួងការពារជាតិជាមុន ទើបកិច្ចសហប្រតិបត្តិការនេះប្រព្រឹត្តទៅបានរលូន និងល្អប្រសើរ៕