
ឧត្តមសេនីយ៍ទោ Winthai Suvaree អ្នកនាំពាក្យយោធាថៃ ទទួលស្គាល់ថាសមរភូមិភ្នំ៣៥០ ប្រាសាទតាក្របី ជាវាពិឃាតលើយោធាថៃ

ភ្នំពេញ៖ សមរភូមិប្រយុទ្ធនៅតំបន់ប្រាសាទតាក្របី ដែលខាងភាគីថៃ ហៅថា Ta Kwai ជាទីតាំងដែលយោធាកម្ពុជាបានកាន់កាប់ទាំងស្រុក ក្រោយការប្រយុទ្ធបង្ហូរឈាមបំផុត ហើយជាទីដែលអ្នកនាំពាក្យយោធាថៃ បានទទួលស្គាល់អំពីភាពរឹងមាំរបស់កម្ពុជា ការបាត់បង់របស់ខ្លួន និងបានហៅតំបន់នោះថា ជាវាលពិឃាត (Killing Field) របស់យោធាថៃ។
យោងតាម សារព័ត៌មានរបស់ថៃ Khaosod English បានដក់ស្រង់សម្តី ឧត្តមសេនីយ៍ទោ Winthai Suvaree អ្នកនាំពាក្យយោធាថៃ (RTA) ផ្សាយនៅថ្ងៃទី៣ខែសីហានេះថា ឧត្តមសេនីយ៍ទោ បានទទួលស្គាល់ថា សមរភូមិភ្នំ៣៥០ ប្រាសាទតាក្របីជាវាលពិឃាត និងជាតំបន់ឈរជើងយ៉ាងរឹងមាំរបស់កងទ័ពកម្ពុជា។
បើតាម Khaosod English ការលើកឡើងនេះ បានកើតឡើងចំពេលដែលសម្ពាធកើនឡើងនៅក្នុងប្រទេសថៃ បន្ទាប់ពីក្រុមបាតុករជាង១ម៉ឺននាក់ នៅថ្ងៃទី២ខែសីហា បានចេញតវ៉ាជាលើកដំបូងចាប់តាំងពីយោធាថៃបើកវាយប្រហារលើកយោធាកម្ពុជានៅតំបន់ប្រាសាទតាមន្តធំ។ នៅពេលដែលទំហំនៃការខូចខាតរបស់ភាគីទាំងសងខាងមិនត្រូវបានបង្ហាញជាសាធារណៈ រហូតដល់បទឈប់បាញ់បានចូលជាធរមានកន្លងទៅ៦ថ្ងៃ ការនិយាយរបស់អ្នកនាំពាក្យរបស់យោធាថៃ បង្ហាញខាតបង់យ៉ាងធ្ងន់ធ្ងររបស់យោធាថៃដែលព្យាយាមក្នុងការដណ្តើមកាន់កាប់តំបន់ប្រាសាទតាក្របី។
Khaosod បានស្រង់សម្តីអ្នកនាំពាក្យយោធាថៃដូចនិយាយថា៖«RTA មិនដែលបញ្ជាក់ថាពួកគេអាចកាន់កាប់តាក្របី រួមទាំងភ្នំ៣៥០ ដោយការដាក់ពង្រាយទ័ពនោះទេ។ ផ្ទុយទៅវិញ តំបន់នេះត្រូវបានគេមើលឃើញថាមានការប្រយុទ្ធគ្នាយ៉ាងខ្លាំង និងការតស៊ូរបស់កម្ពុជាយ៉ាងខ្លាំងមុនពេលមានបទឈប់បាញ់»។ ក្នុងរយៈពេលអនុវត្តកិច្ចព្រមព្រៀងបទឈប់បាញ់ឈាងចូលដល់ថ្ងៃទី៦នេះ ក្រសួងការបរទេសកម្ពុជានិងថៃ បានរៀបចំដំណើរទស្សនកិច្ចទៅកាន់ទីតាំងកើតហេតុផ្ទាល់ ដោយការអញ្ជើញអនុព័ន្ធយោធាអមស្ថានទូតនៃប្រទេសរៀងៗ ទៅកាន់ទីតាំងដែលរងការវាយប្រហារក្នុងប្រទេសរៀងៗខ្លួន៕
