ការវាយប្រហារតាមអាកាសរបស់របបយោធាមីយ៉ាន់ម៉ា នៅរដ្ឋ Kayah បានបណ្ដាលអោយមានអ្នកបាត់បង់ជីវិតបន្តកើនឡើងដល់ ៣២នាក់

ការវាយប្រហារតាមអាកាសរបស់របបយោធាមីយ៉ាន់ម៉ា នៅរដ្ឋ Kayah បានបណ្ដាលអោយមានអ្នកបាត់បង់ជីវិតបន្តកើនឡើងដល់ ៣២នាក់

ភ្នំពេញ៖ គិតត្រឹមរាត្រីថ្ងៃអង្គារទី១៩ ខែសីហា ឆ្នាំ២០២៥ តួលេខមនុស្សស្លាប់ក្នុងការវាយប្រហារអាកាសរបស់របបយោធាមីយ៉ាន់ម៉ា នៅរដ្ឋ Kayah បានកើនឡើងដល់ ៣២ នាក់។ សាកសពពលរដ្ឋត្រូវបានរកឃើញច្រើនឡើងៗ បន្ទាប់ពីយន្តហោះចម្បាំងមីយ៉ាន់ម៉ា ទម្លាក់គ្រាប់បែកកាលពីថ្ងៃអាទិត្យលើតំបន់ Mawchi នៃក្រុង Hpasawng រដ្ឋ Kayah ដែលស្ថិតនៅជាប់ខេត្ត Mae Hong Son ប្រទេសថៃ។

តាមការចុះផ្សាយរបស់ Irrawaddy ក្នុងចំណោមមនុស្សស្លាប់ មានស្រ្តី ៨ នាក់ និងកុមារ ២ នាក់ផងដែរ។ មេដឹកនាំការ៉ែនបានអះអាងថា នេះគឺជាការវាយប្រហារអាកាសដ៏សាហាវបំផុតលើរដ្ឋ Kayah ។ក្រុមប្រឹក្សាប្រតិបត្តិបណ្តោះអាសន្នរដ្ឋ Kayah បានអំពាវនាវដល់សហគមន៍អន្តរជាតិ រួមទាំងអង្គការសហប្រជាជាតិនិងអាស៊ាន សូមធ្វើសកម្មភាពដើម្បីឆ្លើយតបទៅឧក្រិដ្ឋកម្មសង្គ្រាមរបស់របបយោធា។

គួរបញ្ជាក់ថា ស្ថានភាពជម្លោះរវាងរបបមីយ៉ាន់ម៉ា និងក្រុមប្រឆាំងប្រដាប់អាវុធ បានវិវត្តទៅជា សង្គ្រាមស៊ីវិលទ្រង់ទ្រាយធំ ចាប់តាំងពីរដ្ឋប្រហារយោធាខែកុម្ភៈឆ្នាំ ២០២១។ ក្រុមប្រឆាំងជាច្រើនបានបើកការប្រយុទ្ធយ៉ាងខ្លាំងធ្វើឲ្យរបបយោធាជួបឧបសគ្គក្នុងការគ្រប់គ្រងប្រទេស។

បច្ចុប្បន្ន ការប្រយុទ្ធគ្នាបានរីករាលដាលទៅគ្រប់តំបន់ទូទាំងប្រទេសដោយក្រុមប្រឆាំងប្រដាប់អាវុធបានប្រើយុទ្ធសាស្ត្រទ័ពព្រៃ និងអាចដណ្តើមតំបន់ និងទីក្រុងសំខាន់ៗជាច្រើនពីរបបយោធាវិញ។ ក្នុងការឆ្លើយតប ទោះបីជាការប្រយុទ្ធនេះ របបយោធាបានប្រើយន្តហោះទម្លាក់គ្រាប់បែក និងកាំភ្លើងធំវាយប្រហារទៅលើគោលដៅរបស់ក្រុមប្រឆាំង និងភូមិរបស់ប្រជាជន បណ្ដាលឲ្យមានមនុស្សស្លាប់ និងរបួសយ៉ាងរង្គាល៕