ព្រះនាង Bajrakitiyabha ស្ថិតក្នុងស្ថានភាពធ្ងន់ធ្ងរ ជាមួយបញ្ហាសម្ពាធឈាមទាប

ព្រះនាង Bajrakitiyabha ស្ថិតក្នុងស្ថានភាពធ្ងន់ធ្ងរ ជាមួយបញ្ហាសម្ពាធឈាមទាប

ការិយាល័យព្រះបរមរាជវាំង ថៃ បានប្រកាសថា ស្ថានភាពសុខភាពរបស់ព្រះនាង Bajrakitiyabha Narendira Debyavati បុត្រីស្តេច Maha Vajiralongkorn កំពុងធ្លាក់ចុះទៅកាន់ភាពធ្ងន់ធ្ងរជាងមុន ដោយសារតែបញ្ហាសម្ពាធឈាមទាប ទោះបីទទួលបានការព្យាបាលជាបន្តបន្ទាប់ក៏ដោយ។

យោងតាមសារព័ត៌មាន Pattaya Mail ថ្ងៃអង្គារ ដែលដកស្រង់ចេញពីសេចក្តីថ្លែងការណ៍ជាផ្លូវការ លើកទី៥ របស់ការិយាល័យព្រះបរមរាជវាំង បានបញ្ជាក់ថា ព្រះនាង Bajrakitiyabha មានព្រះជន្ម ៤៦ ព្រះវស្សា និងកំពុងសម្រាកព្យាបាលនៅមន្ទីរពេទ្យ King Chulalongkorn Memorial Hospital ចាប់តាំងពីថ្ងៃទី១៥ ខែធ្នូ ឆ្នាំ២០២២ បន្ទាប់ពីប្រឈមជំងឺបេះដូងធ្ងន់ធ្ងរ និងបាត់ស្មារតី។

របាយការណ៍វេជ្ជសាស្ត្រថ្មីបង្ហាញថា ព្រះនាងបានឆ្លងមេរោគតាមសរសៃឈាមយ៉ាងធ្ងន់ នៅថ្ងៃទី៩ សីហា ២០២៥។ ទោះមានការព្យាបាលយ៉ាងជិតស្និទ្ធ សម្ពាធឈាមរបស់ព្រះនាងនៅតែទាប។ គ្រូពេទ្យកំពុងប្រើថ្នាំជំរុញសម្ពាធឈាម រួមជាមួយថ្នាំអង់ទីប៊ីយោទិច ហើយព្រះនាងក៏កំពុងពឹងផ្អែកលើម៉ាស៊ីនជំនួសតម្រងនោម និងម៉ាស៊ីនតាមដានសញ្ញាជីវិតផងដែរ។

សូមជម្រាបថា ព្រះនាង Bajrakitiyabha គឺជាបុត្រីច្បងរបស់ស្តេច Vajiralongkorn និងអតីតព្រះមហេសី Soamsawali។ ព្រះនាងធ្លាប់បំពេញតួនាទីជាឯកអគ្គរាជទូតថៃប្រចាំប្រទេសអូទ្រីស (២០០៨–២០១១) និងធ្លាប់ជាតំណាងថៃក្នុងគណៈកម្មាធិការឧក្រិដ្ឋកម្ម និងគ្រឿងញៀន នៃអង្គការសហប្រជាជាតិ ប្រចាំទីក្រុងវីយែន ផងដែរ៕