Cambodia Trending Close

តម្លៃត្រីរ៉ស់នៅប្រទេសថៃកើនឡើងពី ១៨០ បាត ឡើងដល់ ២៥០ បាត/គីឡូក្រាម ព្រោះខ្វះការផ្គត់ផ្គង់ពីកម្ពុជា

ដោយ៖ គុជ ឥន្ទាវុធ ​​ | ថ្ងៃពុធ ទី២០ ខែសីហា ឆ្នាំ២០២៥ ព័ត៌មានអន្តរជាតិ
តម្លៃត្រីរ៉ស់នៅប្រទេសថៃកើនឡើងពី ១៨០ បាត ឡើងដល់ ២៥០ បាត/គីឡូក្រាម ព្រោះខ្វះការផ្គត់ផ្គង់ពីកម្ពុជា តម្លៃត្រីរ៉ស់នៅប្រទេសថៃកើនឡើងពី ១៨០ បាត ឡើងដល់ ២៥០ បាត/គីឡូក្រាម ព្រោះខ្វះការផ្គត់ផ្គង់ពីកម្ពុជា

បើយោងតាមកាសែត Khaosod បានរាយការណ៍ថា តម្លៃត្រីរ៉ស់ (ត្រីផ្ទក់) នៅប្រទេសថៃកើនឡើងយ៉ាងគួរឱ្យកត់សម្គាល់ ពីត្រឹម ១៨០ បាត/គីឡូក្រាម (ប្រហែល ២២,០០០ រៀល) ឡើងដល់ ២៥០ បាត/គីឡូក្រាម ដោយសារកង្វះផ្គត់ផ្គង់ក្នុងទីផ្សារ។
អាជីវករថៃឲ្យដឹងថា មូលហេតុចម្បងនៃការខ្វះផ្គត់ផ្គង់ គឺពួកគេមិនអាចនាំចូលត្រីរ៉ស់ពីកម្ពុជា បាន ដោយសារតែការបិទព្រំដែន នេះជាផលវិបាក ដែលធ្វើឲ្យមានតម្រូវឱ្យត្រីនៅក្នុងស្រុកថៃត្រូវតែប្រើប្រាស់សម្រាប់ទីផ្សារផ្ទាល់។
នៅថ្ងៃទី១៩ សីហា ២០២៥ អ្នកសារព័ត៌មាន Khaosod បានចុះពិនិត្យផ្សារ «Kamphaeng Phet Shopping Center» ខេត្ត Kamphaeng Phet ហើយរកឃើញថា គ្មានត្រីរ៉ស់ដាក់លក់ស្ទើរតែទាំងស្រុង មានត្រឹមតូបតែមួយប៉ុណ្ណោះដែលនៅសល់ត្រីរ៉ស់តែមួយក្បាល ខណៈតូបភាគច្រើនលក់តែត្រីទីឡាព្យ៉ា និងត្រីប្រភេទផ្សេងៗ ដូចជា ទីឡាព្យ៉ាខ្មៅ ត្រីអណ្ដែងកន្ទុយក្រហម ត្រីកញ្ចុះ ត្រីអណ្ដែង និងកង្កែប។
អាជីវករបន្ថែមថា ត្រីរ៉ស់បានអស់ពីស្តុកជាយូរមកហើយ បណ្តាលឲ្យតម្លៃឡើងថ្លៃខ្លាំង ទោះបីតម្លៃកើនដល់ ២៥០ បាត/គីឡូក្រាមក្តី ក៏នៅតែមិនមានត្រីសម្រាប់លក់។ នៅតែមានត្រីរ៉ស់តូចៗចេញពីកន្លែងចិញ្ចឹមក្នុងស្រុក ប៉ុន្តែមិនទាក់ទាញអ្នកទិញ ព្រោះត្រីតូចច្រើន ៣–៤ ក្បាល ទើបមានទម្ងន់១គីឡូក្រាម ខណៈភោជនីយដ្ឋានចង់បានត្រីរ៉ស់ធំៗសម្រាប់ចម្អិនម្ហូប។
តាមពាក្យអាជីវករលក់ត្រី ប្រភពផ្គត់ផ្គង់ត្រីរ៉ស់សំខាន់របស់ទីផ្សារថៃ គឺមកពីកម្ពុជា តាមរយៈការចិញ្ចឹមរបស់កសិករ និងការទិញចូលដោយឈ្មួញកណ្តាល។ ការបិទព្រំដែនធ្វើឲ្យការនាំចូលត្រីពីកម្ពុជាត្រូវផ្អាក បណ្តាលឲ្យផ្គត់ផ្គង់មានកម្រនិងតម្លៃហក់ឡើង៕

អត្ថបទទាក់ទង