យន្តហោះចម្បាំងមីយ៉ាន់ម៉ា បន្តវាយប្រហារតាមអាកាសលើរដ្ឋ Shan និង Kayah ជាប់ព្រំដែនប្រទេសថៃ

យន្តហោះចម្បាំងមីយ៉ាន់ម៉ា បន្តវាយប្រហារតាមអាកាសលើរដ្ឋ Shan និង Kayah ជាប់ព្រំដែនប្រទេសថៃ

របបយោធាមីយ៉ាន់ម៉ា បានបើកការវាយប្រហារអាកាសថ្មីលើរដ្ឋ Shan ដែលស្ថិតជាប់ខេត្ត Chiang Rai, Chiang Mai និង Mae Hong Son ប្រទេសថៃ។

តាមការផ្សាយរបស់ Irrawaddy នៅថ្ងៃទី២៥ ខែសីហា ឆ្នាំ២០២៥ យន្តហោះចម្បាំងមីយ៉ាន់ម៉ា បានទម្លាក់គ្រាប់បែកចំវត្តមួយក្នុងតំបន់ Mongngawt បណ្តាលឲ្យកុមារម្នាក់ស្លាប់ និងមានមនុស្ស៧នាក់រងរបួស រួមទាំងព្រះសង្ឃចំនួន២អង្គ។
យន្តហោះចម្បាំងកងទ័ពអាកាសមីយ៉ាន់ម៉ា ក៏បានទម្លាក់គ្រាប់បែកនៅតំបន់ផ្សេងៗ ដូចជា Mogoke, Kyaukme និង Hsipaw បណ្តាលឲ្យកុមារចំនួន៣នាក់ ស្រ្តី១៧នាក់ បុរស១៦នាក់ និងព្រះសង្ឃ២អង្គស្លាប់ ហើយមានមនុស្ស៣៣នាក់ទៀតរងរបួស។
មិនមែនតែរដ្ឋ Shan ទេ, នៅរដ្ឋ Kayah ដែលស្ថិតជាប់ព្រំដែនថៃកាលពីសប្តាហ៍មុន, យន្តហោះចម្បាំងកងទ័ពអាកាសមីយ៉ាន់ម៉ា ក៏បានធ្វើការវាយប្រហារយ៉ាងធ្ងន់ធ្ងរ បណ្តាលឲ្យមនុស្សស្លាប់រាប់សិបនាក់ រួមទាំងស្រ្តី៨នាក់ និងកុមារ២នាក់។ មេដឹកនាំការ៉ែនអះអាងថា នេះគឺជាការវាយប្រហារអាកាសដ៏សាហាវបំផុតលើរដ្ឋ Kayah។

សូមជម្រាបថា ក្រុមប្រឹក្សាប្រតិបត្តិបណ្តោះអាសន្នរដ្ឋ Kayah បានអំពាវនាវដល់សហគមន៍អន្តរជាតិ រួមទាំងអង្គការសហប្រជាជាតិនិងអាស៊ាន សូមធ្វើសកម្មភាពឆ្លើយតបទៅឧក្រិដ្ឋកម្មសង្គ្រាមរបស់របបយោធា៕